- 284 -

1373 Febr. 6. Liegnitz.

Herzog Ludwig bestätigt für sich und als Vormund seiner Vettern den an die Stadt erfolgten Verkauf der Erbgerichte, zweier Badestuben und des Kuttelhofes.

In gots namen amen. Wir Ludwig von gots gnaden herczog in Slezien herre zcum Brege, vormunde der irluchten fursten Ruprechts, Wenczels, Bonczels vnde Heynrichs, gebrudirr, ouch von gots gnadin herczogin in Slezien herren czu Legnicz vnsire lyeben vettirn, tun offentlichen kunt allen den, dy desin briff sehen adir horen lezen, daz in vnsir keginwertikheit komen synt in vormundeschaft Jesken vnde Hancken kyndere, dy erberichtere czu Legnicz gewest synt ettiswenne, dy erbern manne Peczsche von Reichenbach, burger czu Swydenicz vnde Junge Hans burger czu Legnicz, dy wir ouch den seibin kyndern von rechts wegin czu vormunden hatten gegebin, vnde habin bekannt, daz sy mit wolbedochtem mute, myt grosem rate der selbyn kinder frunde vnde czu vore mit vnsirm vnde vnsir vorgnantin vettirn rate, gonst vnde willen, dy wir vnde sy myt volkomheit do czu getan vnde gegeben habin, recht vnde redelich vorkouft haben vnsin lyebin getruwen . . ratmannen . . schepphen, geswornen vz vnde in allen handwerken vnde der ganczen gemeynen der vorgnanten vnsirn vettirn stad Legnicz, den, dy yczunt syn vnde allen den, dy hernach ewiklich werden in czukomftigen czeiten, daz erbegerichte der selben vnsir vettirn stad Legnicz, czwn bodestobin, dy iczlich jor czen marg groschen czinsen, fymfvndfymfczig steyne vnsletczinses vndir den fleyschbenken vnde ouch den kottelhoff doselbist zcu Legnicz frey vnde ledik allis dinstes vnde allir beswerunge en vnde erin nachkomlingin, dy mytburger vnde mytwoner der stad Legnicz hernachmols syn werden ewiklich, in czukomftigin cziten ewiklich vnd erblich von der stad Legnicz wegin czu habin vnde alz sy an dy seibin kynder vorbas syn bekomen vnde bynamen in alle der mozse vnde wyze, alz in den hantfesten, dy von aldirs dor obir gegebin syn, volkomlich steet bescrebin, vnde habin dy vorgnantin stukke beyde, daz erbegerichte, dy czwir bodestobin, dy fymfundfymfczig steyne vnsletczinses vnde den kotilhoff in irre vormundeschaft von der obgnanten kinder wegin vffgelosen in vnsir vnde in vnsir egnanten vettirn gnade vnde hende vnde baten vns durch got, daz obgnante erbegerichte zcu lyen; dez haben wir durch got vnde durch erre bete wille en dez koufs vnde vfflozsunge gegonst, lyen, reichen vnde habin gelegin daz vorgenante erbegerichte, czwu badestoben vnde fymffundfymfczig steyne vnsletczinses vnde den kottelhoff zcu Legnicz, frey vnde ledig alles dinstis vnde allir beswerunge myt geheyse vnsir egnantin vettirn in erre kegenwertikheit myt rate erre eldesten getruwen manne den vorgnantin ratlewten, scheppfen. geswornen vz vnde in allen hantwerken vnde der ganczen gemeinen der vorgnanten vnsir vettirn stad Legnicz, dy iczunt eynt, vnde erin nachkomlingen, dy mytborger vnde mytwoner der stad Legnicz werden hernachmols in czukomftigen czeitin ewiklichen syn, in allir moze vnde wize, alze dy alden hantvestin vnde briff, dy dor obir gescreben synt volkomlifch, bekennen von der stad wegin Legnicz von vns, alz vom eym vormunde, dy weile wir vormunde synt, vnde von vnsern obgnanten vettern vnde von erin nachkomlingen, alzo von rechtin erbherren ewiklich vnde erblichin in aller weyse, alzo vorgescrebin steet, zcu habin, zcu besiczczin vnde an der egnanten stad nucz vnde vromen zcu wenden, alz ir daz allir nuczlichst mag gesyn, vnde haben dez czu grosir sichchirheit en desin briff myt vnsern egnanten vettirn ingesegel myt erim geheyse vnde myt irre alden getruwen manne rathe vorsegelt heysen gebin czu Legnicz an sente Dorotheen tage, nach gots gebort dreyczen hundirt jar ym dritten vnde sebenczichstin jore in kegenwertikheit vnsir lyeben getruwen, hern Petirs von Parchwicz, her Hansen von Kothewicz, her Otten Buzewoy rittir, Hansen von Slewicz, Steffan Trachen, Nyckel Pyskersdorffs, Henczschels von Redirn, Herteil Buzewoys vnde Thomas vnsirs screbers, dem desir briff beuolen wart.

O. d. St. L. No. 133. Das Siegel an grünseidner Schnur. — Bitschens Privilegb. f. VIIIb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866